Nuwun,
Kepareng
dhumateng Ibu Kepala Sekolah SMA N 1 Sewon ingkang dahat kinabekten, Bapak Ibu
guru saha karyawan ingkang kinurmatan, para kanca
siswa-siswi saha perwakilan diajeng ingkang kula tresnani, kula aturaken sugeng
enjeng.
Sumangga ingkang sepisan kula panjenengan sami tansah
manungka puja miwah puji syukur dhumateng Gusti Maha Kuwaos awit sampun
maringaken berkah pangestu dhumateng kula panjenengan sami saengga kula lan
panjenengan sami saged kempal manunggal kanthi tentrem, bagas, waras, kebak ing
kabegjan salebetipun pahargyan pengetan dinten Kartini samangke punika.
Sedherek sekaliyan ingkang satuhu luhuring budi,
Pangetan dinten Kartini wigatos sanget tumrap kula
panjenengan sadaya. R.A. Kartini pindhanipun sekar ingkang tansah mbabar
angambar ganda arum ing bangsa Indonesia. Panjenenganipun punika pangarsa
tumrap wanita ingkang karyanipun mligi kangge majengipun wanita wiwit duk
rikala bangsa Indonesia taksih dipuncengkerem dening bangsa penjajah.
Pancen sampun dipunkodrataken para wanita saha limrah
nggadahi raos ingkang kalangkung alus, sanadyan makaten geget ing manah tansah
makantar-kantar pindha waja ngudi kautaman. Panyengkuyungipun para wanita boten
saged dipunremehaken, malah kepara langkung bobotipun tumrap tiyang jaler
kangge pembangunan majengipun bangsa punika. Contonipun mawon, negari kula kaliyan
panjenengan sami menika, negari Indonesia ingkang nate dipunpandegani piyantun
putri inggih menika Ibu Megawati Soekarno Putri.
Ing Pengetan dinten Kartini menika inggih
dipunwonteni pagelaran fashion show diajeng minangka simbol Kartini ing zaman modern
sakmenika. Sanajan pengetan dinten
Kartini dipunwonteni saben taun, mila mekaten kedahipun mboten naming wanci
pengetan menika kemawon kita saged nyaosaken hasil karya lan cipta kaum wanita.
Mugi-mugi saben dinten, saben wekdal wanita Indonesia tetep makarya kangge mujudaken citra pribadi
bangsa ingkang tansah mbabar angambar ganda arum.
Kanti makaten punika sumangga kita kados dene bibit enggal
kartini nem-neman sami ngudi kawruh kanti manah ingkang tansah makantar-kantar.
Saengga kita wanita Indonesia saged nglajengaken gegayuhan tuwin labuh labetipun
Ibu Kartini ingkang luhur punika. Ingkang boten kenging dipunlirwakaken inggih
punika tansah ngudi jatidhirinipun wanita Indonesia. Wanita Indonesia ingkang
prasaja, mrantasi sadhengah karya.
Matur nuwun awit kawigatosanipun. Ing pungkasaning atur,
menawi kula gadhah kelepatan, kula nyuwun agunging samodra pangaksami.
Sugeng Enjeng